25.04.2024

Қазақстан Республикасында тұңғыш рет Денсаулық сақтау министрлігінің бастамасымен және AYALA қайырымдылық қорының қолдауымен Қазақстан Республикасының барлық өңірлеріндегі босандыру медициналық ұйымдары үшін 350 дана пневматикалық емес шокқа қарсы киім сатып алынады және беріледі. Бүгін Астанада алғашқы 9 костюм берілді: 3 — перинаталдық орталықтарға, 4 — көшпелі бригадаларды қамтамасыз ету үшін қалалық жедел медициналық жәрдем станцияларына, сондай-ақ оларды «UMC» КФ және болашақ медицина жұмыскерлерін оқыту үшін «Астана медициналық университеті» АҚ алады.

Әлемде жиналған үлкен дәлел базасы ана өлімін төмендетуде пневматикалық емес шокқа қарсы киімді пайдаланудың тиімділігін айғақтайды. Дүниежүзілік денсаулық сақтау ұйымы пациенттің тиісті медициналық көмекке қол жеткізуіне дейін оны уақытша шара ретінде қолдануды ұсынады. ЮНИСЕФ осы үнемді өнімнің бүкіл әлемде қолжетімділігін қамтамасыз ету үшін оны масштабтау үшін өзінің инновациялық жобалар портфеліне қосты.

ДДҰ деректері бойынша қан кету бүкіл әлемде ана өлімінің басты себебі болып табылады, оның ішінде 75%-ға жуығында босанғаннан кейінгі қан кетеді. Алдын алу және емдеу мүмкіндіктеріне қарамастан, босанғаннан кейінгі қан кету жылына шамамен 7000 немесе әлемдегі барлық ана өлімінің 25%-ын құрайды.

Сондықтан пневматикалық емес шокқа қарсы киім репродуктивті денсаулық, аналар, жаңа туған нәрестелер мен балалар денсаулығы саласындағы негізгі араласулар үшін ДДҰ, ЮНИСЕФ және БҰҰ Халық қоныстану қорының (ЮНФПА) медициналық бұйымдарының ведомствоаралық тізбесіне енгізілген. Бұл киім жатырға қан ағынын азайтады, қан мөлшерінің азаюынан шокты емдейді және қаны кеткен әйелдің өмірін 48 сағатқа дейін сақтай алады. Бұдан басқа, оны зарарсыздандырудан кейін бірнеше рет пайдалануға болады.

«ҚР Денсаулық сақтау министрлігімен бірге ана өлімін азайту сияқты маңызды міндетті шешуге қатысуға қуаныштымыз. Астанада Халықаралық акушерлер конгресінде пневматикалық емес шокқа қарсы киімдердің алғашқы көрсетілімі үлкен назар аударды және қызығушылық тудырды, себебі қолдану – қарапайым, ал нәтижесі айтарлықтай жылдам. Қор серіктестері де бұл жобаның өзектілігі мен маңыздылығын түсінеді. Біздің ортақ күш-жігеріміз Қазақстандағы жүздеген әйелдердің өмірін сақтап қалуға көмектеседі деп үміттенеміз», — деп атап өтті AYALA Қайырымдылық қорының негізін қалаушы және президенті Айдан Сүлейменова.

Медициналық көмек көрсету сапасын жақсарту үшін ҚР ДСМ жұмыс тобы клиникалық хаттаманы өзектендірді. Оған еліміздің жетекші профессорлары кірді. Халықаралық стандартты ескере отырып, олар оған босанғаннан кейінгі қан кету кезінде әйелдердің жағдайын тұрақтандыру үшін пайдаланылатын алғашқы медициналық көмек көрсетудің жаңа әдісін енгізді. Өзектендірілген Клиникалық хаттама акушерлікте босанғаннан кейінгі қан кетулер кезінде шокқа қарсы пневматикалық емес киімді қолдануды ұсынады.

Өзектендірілген клиникалық хаттаманың әзірлеушісі, профессор Г.Б.Бапаева бүгін Астана қаласының босандыру ұйымдарының, жедел медициналық жәрдем станцияларының медицина жұмыскерлері және Медицина университетінің «Акушерлік және гинекология» кафедрасының жұмыскерлері үшін осы киімді қолдану бойынша шеберлік сыныбын өткізеді.

Пневматикалық емес шокқа қарсы киім – бұл босанғаннан кейінгі тұрақты қан кетуді шектейтін қымбат емес алғашқы көмек. Бұл бастапқыда АҚШ-тың Аэронавтика және ғарыш кеңістігін зерттеу жөніндегі ұлттық басқармасы (НАСА) технологияларын пайдалану арқылы ғарышкерлердің экстремалдық екпін кезінде есін жоғалтпауы үшін әзірленген компрессиялық костюм, ол қолдар мен аяқтарының қысылуы арқасында қанды басына қарай итереді. Осы технология пневматикалық емес шокқа қарсы киімді әзірлеуде де қолданылған: әйел денесінің төменгі бөлігіне сыртқы қысым салынады, ол қанды жоғары қарай бағыттап, жоғалтуды азайтады және бірте-бірте тоқтатады.